Kryetari i Bashkisë Maliq, Gëzim Topçiu, po përgatit një material zyrtar për t’ia dërguar Kuvendit të Shqipërisë, ku do të parashtrojë vërejtjet dhe paqartësitë e tij lidhur me projektligjin e ri të reformës administrative që parashikon bashkimin e Maliqit me Bashkinë Korçë.
Sipas kreut të bashkisë, projektligji i propozuar nuk parashikon shkrirjen e Maliqit, por bashkimin e tij me Korçën. Në këtë kuadër, organizimi i brendshëm do të ndryshojë duke sjellë një strukturë me zëvendëskryetar funksional, ndërsa njësitë administrative ekzistuese të Maliqit do të vazhdojnë të varen nga qendra e Maliqit dhe jo drejtpërdrejt nga Korça.
Ndryshimet ligjore dhe impakti te qytetarët
Topçiu sqaroi se ky proces kërkon qartësi të plotë dhe nuk mund të trajtohet me një qëndrim të thjeshtë pro ose kundër. Ai vuri në dukje se reforma kërkon ndërhyrje shoqëruese në ligjin për pushtetin vendor, financat vendore dhe kompetencat e qyteteve, pasi prek një komunitet të gjerë prej rreth 31 mijë banorësh sipas censusit të fundit, nga më shumë se 65 mijë banorë që figurojnë në gjendjen civile.
Kryebashkiaku i Maliqit nënvizoi se vëmendja e këtij debati nuk duhet të përqendrohet te karrigia e drejtuesit vendor, por te mënyra se si ky ndryshim do të ndikojë te njerëzit e thjeshtë. Sipas tij, mbetet thelbësore të dihet se sa do të afrohen shërbimet, si do të lehtësohet zgjidhja e problemeve dhe sa do të rriten investimet për territorin e Maliqit.
