Ditët e fundit në rrjetet sociale ka pasur postime të shumta dhe denoncime se qentë e rrugës por edhe ata shtëpiakë po helmohen me ushqim. Denoncimet e qytetarëve kanë gjetur edhe mbështetjen e shoqatave që mbrojnë të drejtat e qenve të cilat kanë akuzuar në postet e tyre Bashkinë Korçë dhe kryetarin e saj Sotiraq Filo për këto krime.
Diçka e tillë e përsëritur vjen në sezon turistik në Korçë, kohë kur në të cilën shtohet numri i vizitorëve por edhe ankesat e tyre se shqetësohen nga qentë e rrugës.
Edhe Televizioni News 24 i ka kushtuar hapsirë televizive këtij shqetësimi. Sipas raportimit të korespodentes Lorena Kodra, denoncimet kanë qenë të shumta sidomos në rrjete sociale, por bashkia Korçë mohon kategorikisht se ka gisht në këtë çështje.
Nga ana tjetër bashkia ka thënë se bën vetëm vaksinim dhe sterilizim të qenve dhe asgjë më tepër. Nga ana tjetër qytetarët janë shprehur në intervista se ndihen të shqetësuar dhe rrezikuar prej tyre dhe kanë kërkuar që bashkia të ngrejë një qendër grumbullimi për qentë, e cila në Korçë mungon.
Pyetja që ngrihet në këtë rast është: A po i helmon bashkia qentë? Apo i helmojnë qytetarët?
Fakti që ky problem është i përsëritur tregon se organet shtetërore ligjzbatuese duhet të nisin një hetim mbi këto raste. Në fund të fundit edhe kafsha ka të drejtat e saj dhe duhet të mos i merret jeta në këtë formë makabre.
Nga ana tjetër ajo që është më e rëndësishme janë shoqatat, të cilat nuk duhet të ngrejnë zërin vetëm për të kapur disa fonde, por të veprojnë me hapa konkretë për të parandaluar këtë fenomen dhe për të vënë para përgjegjlsisë këdo që bënë këtë akt kriminial.
