Pas përfundimit të dy fazave të para të kampionatit të Kategorisë së Parë, Pogradeci u rendit në vendin e pestë me 31 pikë dhe golavarazh 19-25.
Duke qenë si skuadër debutuese në të parën, ecuria e liqenorëve ka qenë mjaft e mirë, gjë të cilën për Kolibri.al e konfirmoi administratori i Pogradecit, Kopi Gusho.
“Pozicionimi në gjashtëshen e parë të renditjes, ishte objektivi ynë për dy fazat e para. Në përgjithësi, skuadra ka zhvilluar ndeshje të mira. Në disa përballje, si në fushën tonë ashtu dhe jashtë, na ka munguar fati, pasi do të kishim një renditje më të mirë.
Gjithsesi, paraqitjen e skuadrës e konsideroj pozitive”, u shpreh fillimisht administratori i liqenorëve.
Ndeshja me Apoloninë që u zhvillua në “Loni Papuçiu” dhe u mbyll në barazim pa gola, për administratorin Gusho skuadra realizoi atë që dëshironte, rezultatin pozitiv.
“Ndaj Apolonisë ishte një ndeshje e vështirë, për vetë objektivat që kishin të dyja skuadrat për pozicionimin në renditje. Arritëm të merrnim rezultatin e duhur.
Në përgjithësi, Pogradeci zhvilloi një ndeshje të mirë, duke e mos e vënë në dyshim marrjen e rezultatit pozitiv”, vijon më tej drejtuesi i klubit liqenor.
Skema e paracaktuar e fazës së tretë i ka vënë sërish skuadrat përballë njëra-tjetrës, por kësaj radhe do të ndeshen në “Gjorgji Kyçyku”.
“Ndeshjet e kësaj faze janë sa interesante dhe të rëndësishme. Nga java në javë, skuadra po tregon rritje në lojën e sajë. Kjo më bën optimist se Pogradeci do të shkojë te fitorja në duelin e së hënën ndaj Apolonisë”, mbyll komentin administratori Gusho.
Në të dy përballjet e këtij kampionati, liqenorët kanë marrë një fitore dhe një barazim ndaj fierakëve. Në ndeshjen e zhvilluar për llogaritë e javës së 11-të, ka vendosur autogoli i shënuar në të 81-ën, nga Ndubuisi.
