Për të kuptuar se ku shkon babëzia për para dhe mënyra sesi disa njerëz e kërkojnë të mirën materiale, mjafton të bëjmë një xhiro për në Qafë-Thanë.
Prej disa muajsh në këtë zonë aksidentet janë bërë shumë të shpeshta dhe kjo ka ngritur alarmin.
Shumë shpesh përdoruesit e rrugës janë ankuar për prani vaji në rrugë dhe çdo ditë e më shumë po vërtetohet se serviset dhe karrotrecët e zonës shpërndajnë vaj në mënyrë që të ndodhin aksidente dhe shoferët të shkojnë të kërkojnë ndihmë tek ata.
Një qytetar ka sjellë në redaksinë tonë edhe një tjetër pamje, ku vihet re qartë prania e vajit në rrugë. Ndërkohë, policia nuk ka marrë asnjë masë në lidhje me këtë çështje, që po rrezikon jetën e udhëtarëve dhe nuk ka vënë asnjë person para drejtësisë.
Në këtë rrugë kalojnë shumë kamionë dhe automjete, çka e bën akoma më të rrezikshme situatën, pasi përplasja e autoveturave me mjetet e tonazhit të rëndë është fatal.
