Sot në universitetin “Fan S. Noli” në Korçë është përkujtuar dhe vlerësuar filantropi i njohur korçar dhe personaliteti Thoma Turtulli, në një takim të organizuar nga Fakulteti i Shkencave Natyrore e Humane të Universitetit “Fan Noli” me kujdesin e Dekanes, znj. Sonela Stillo.
Thoma Turtulli ishte bamirësi që i dhuroi Korçës shumë objekte të rëndësishme, spitalin, bibliotekën, kinemanë, liceun dhe jetimoren. Ky filantrop shpëtoi nga vdekja me dhjetëra njerëz, me spitalin që ngriti në Korçë. Por jo vetëm kaq. Ai i dhuroi qytetit arsimdashës të Korçës, bibliotekën, duke parë etjen e madhe për dije të korçarëve. Thoma Turtulli i dhuroi Korçës edhe liceun këtë vatër dije, brenda e jashtë Shqipërisë.
Veprat e këtij bamirësi të madh edhe sot shkëlqejnë në Korçën tonë dhe janë shprehje e frymës evropiane që mbolli në këtë qytet, Thoma Turtulli e filantropë të tjerë me emër. Thoma Turtulli është shembulli më i mirë për të gjithë ne, që në jetën tonë me punën tonë dhe veprat tona të lemë gjurmë të mira, sado të vogla për qytetin dhe vendin tonë.
