3 shkolla të mbyllura në qarkun e Korçës në vitin e ri të sistemit arsimor parauniversitar, dy prej të cilave janë në fshatrat e Pogradecit dhe një në të Korçës.
Nga ana tjetër këtë vit të ri shkollor janë 167 nxënës më pak në klasat e para se një vit më parë ndërkohë që 6 klasa të para nuk janë çelur për këtë vit në gjithë Qarkun. Ulje ka dhe në klasat e 10-ta, me 240 nxënës me pak se viti i kaluar
Situatë e vështirë është dhe në Maliq, aty ku Ardi Gërmenji, kryetar i Sindikatës të Arsimit në Maliq lëshon alarmin se për shkak të uljes së numrit të nxënësve me dhjetra mësues rrezikojnë vendet e punës.
“Situata në shkollat e Maliqit është me rënie të numrit të nxënësve dhe kjo sjell probleme të vazhdueshme në numrin e mësuesve që janë të punësuar apo kërkojnë të punësohen. Është problem i vazhdueshëm në vite qe me largimin e njerëzve apo probleme të ndryshme sociale kemi ulje të përvitshme dhe rrezikim për vendet e punës të mësuesve. Situata nuk është aspak e mirë, që do të thotë fëmijë janë shumë më pak dhe puna e mësuesve është çdo ditë e më shumë e rrezikuar “ – është shprehur Ardi Gërmenji
Këtë vit të ri arsimor do të ulen në bangot e shkollës 19.776 nxënës të gjitha niveleve të arsimit parauniversitar ndërkohë që vetëm në klasat e para janë 1526 nxënës.
