James Leithart është emri i të riut nga Shtetet e Bashkuara, i cili la qytetin e Nju Yorkut për të jetuar në Shqipëri.
Leithart jeton prej disa vitesh tashmë në qytetin e bukur të Pogradecit. Ai thotë se e do shumë vendin tonë aq sa realizon edhe video vetëm për të treguar se Shqipëria është një vend shumë i bukur, me pasuri natyrore e kulturore dhe njerëz fantastikë.
James ka ardhur në Shqipëri fillimisht mbi gjashtë vite më parë me babanë e tij dhe që nga ajo kohë u dashurua me vendin tonë e sidomos me qytetin liqenor dhe rrethinat e tij.
I riu punon në një Universitet privat në Pogradec(Nehemia) dhe bën video siç thamë edhe më lart për natyrën, trashëgiminë kulturore e historike të zonës dhe të gjithë Shqipërisë.
Në një intervistë më herët për Adi Krastën ai ka thënë se: “E vizitova Shqipërinë, më pëlqeu shumë, jeta është fantastike këtu dhe e dua shumë këtë vend, kam bërë shumë miq këtu.’’
James është i dashuruar më së pari me Pogradecin dhe më pas me çdo vend të bukur që Shqipëria ka dhe ai i zbulon periodikisht. Ka një super talent në krijimine videove dhe shkrepjen e fotove.
Është një nga promotorët e shumtë të Pogradecit, juglindjes dhe gjithë Shqipërisë. Ka shumë amerikanë që vijnë në Shqipëri falë postimeve të tij në rrjetet sociale.
Jamesi është mësuar tashmë me jetën e Pogradecit dhe Shqipërisë dhe as nuk e mendon më rikthimin në SHBA përveçse për vizita.
