Ministri i brendshëm Taulant Balla zhvilloi analizën vjetore në Ersekë duke përfshirë DVP Korçë dhe DVP Gjirokastër. Burime brenda mbledhjes së analizës bënë me dije se Balla u ndal në disa pika kryesore duke lënë edhe porositë e tij ndaj drejtuesve të policisë.
Ai u ndal në krimet e vjetra të pazbardhura, duke përmendur faktin se janë mbi 40 vrasje në qarkun e Korçës dhe Gjirokastrës që nuk janë zbuluar, ndërsa ka lënë porosi për tu hetuar. Sipas Ballës, krimet e vjetra duhet të rihapen si hetime, kryesisht të vrasjeve të cilat aktualisht nuk parashkruhen. Trafiku i armëve dhe kontrabandimi ishte një tjetër pikë që ai u ndal gjatë mbledhjes.
Po ashtu, fokusi në trafikun e paligjshëm, duke rikujtuar rastin e punonjësit të policisë Stiljan Pasho, dhe duke e cilësuar si sëmundje të vjetër që nuk duhet të ndodhë më.
Balla u ndal edhe tek pikat kufitare, duke thënë se do përmirësohen kushtet e doganave, si edhe do bëhen trajnime të punonjësve në pkk. Ai ka kërkuar heqjen nga harta si vend kultivimi të kanabisit në zonën e Korccës dhe Gjirokastrës, dhe mos të ketë asnjë rast që policia greke të kapë drogë të shkuar nga Shqipëria.
Porosi tjetër e ministrit Balla në mbledhjen e analizës ka qenë dhuna në familje ku duhen evidentuar të gjitha rastet, si edhe dhuna online nëpërmjet aplikacioneve që ka sjellë edhe pasoja të rënda, në humbje jete.
Balla u ndal edhe tek aksidentet rrugore, duke kërkuar nga sektori i qarkullimit të të dyja drejtorive vendore pjesëmarrëse në këtë analizë, që të merren masa dhe numri i aksidenteve sidomos ato me vdekje të jetë i ulët.
Balla ka thënë se në korrik të këtij viti do të ketë rritje të pagave të punonjësve të policisë, ndërsa në fund të fjalës së tij ka kërkuar që duhet të bëjnë policinë e shtetit të një standarti të lartë, në zbatim të ligjit, që askush të mos i kthejë një gjysëm fjale.
