Ansambli i Këngës dhe Valles “Skënderbeu” i Korçës ka zhvilluar një koncert të veçantë në qytetin e Gostivarit në Maqedoninë e Veriut, si pjesë e një turneu artistik në viset shqiptare. Aktiviteti u organizua me nismën e drejtuesit artistik të ansamblit, Josif Minga, me synimin për të forcuar bashkëpunimin kulturor dhe shkëmbimin e vlerave artistike mes shqiptarëve në hapësira të ndryshme gjeografike.
Në skenën e Gostivarit, artistët korçarë sollën këngë, valle dhe kostume tradicionale, duke përcjellë me dinjitet trashëgiminë kulturore të trevës së tyre dhe duke krijuar ura miqësie me publikun vendas.
“Ka qenë një koncert i cili është shijuar jo vetëm nga qytetarët, por edhe nga profesionistët e fushës që ishin të ftuar”, u shpreh kompozitori dhe producenti Afrim Ajdari.
Ndërkohë, drejtori i Ansamblit të Këngës dhe Valles “Shqip” në RMV, Jetmir Rexhepi, theksoi rëndësinë e këtyre bashkëpunimeve për ruajtjen dhe promovimin e identitetit kulturor shqiptar në rajon.
Turneu i Ansamblit “Skënderbeu” pritet të vijojë edhe në qytete të tjera shqiptare, duke i dhënë jetë një rrugëtimi artistik që bashkon traditën me bashkëkohoren dhe forcon lidhjet mes shqiptarëve kudo që ndodhen.
