Në qarkun e Korçës, aplikimet për skemat kombëtare të mbështetjes së bujqësisë kanë ecur me ritme të shpejta, duke treguar interes të lartë nga fermerët. Deri tani, janë kryer 9054 aplikime për skemat që mbulojnë bujqësinë, blegtorinë dhe bletarinë. Siç ka ndodhur edhe vitet e kaluara, skema e naftës është ajo që ka tërhequr më shumë aplikime, me 7240 fermerë që kanë shprehur interes për këtë ndihmë.
Përveç skemës së naftës, ka pasur aplikime edhe për skemat e blegtorisë dhe bletarisë, me 1814 aplikime që janë regjistruar në këto kategori. Fermerët e shprehin kënaqësinë e tyre për këto mbështetje, duke i konsideruar si një ndihmë të rëndësishme për ekonomitë e tyre.
Zgjerimi i skemës së blegtorisë ka çuar në një rritje të numrit të aplikimeve nga blegtorët në rajonin e juglindjes. Ndryshe nga vitet e kaluara, për aplikimin në skemat e bujqësisë, fermerët duhet të paraqesin dokumente shtesë, si skicat e tokës dhe faturat e shitjes së imputeve apo prodhimit.
Aplikimet për të gjitha skemat do të mbyllen më 30 maj, dhe më pas do të nisë procesi i verifikimit në terren nga specialistët e bujqësisë për të siguruar që të gjitha kriteret janë plotësuar.
