Shqipëria dhe veçanërisht zona e juglindjes po tërheqin gjithnjë e më shumë vëmendjen e turistëve të huaj, kryesisht nga vendet perëndimore. Një nga tendencat në rritje gjatë viteve të fundit është vizita në sajtet historike dhe arkeologjike, duke e kthyer trashëgiminë kulturore në një burim të rëndësishëm interesi ndërkombëtar.
Një grup arkeologësh dhe pedagogësh nga Universiteti i Salzburgut vizituan sot Tumën e Kamenicës, një nga monumentet më të njohura arkeologjike të vendit tonë. Profesorët Rubeer Bretwiser dhe Martin Chiefberger vlerësuan rëndësinë e madhe të saj, duke theksuar se Shqipëria dhe Korça kanë shumë site të vyera që meritojnë vizitë, por që kanë nevojë urgjente për më shumë investime në kërkime dhe zbulime.
Rubeer Bretwiser tha: “Tuma e Kamenicës është një nga vendet më interesante që kam parë. Është një nga sajtet më të mirëmbajtura. Problemi është se institucionet duhet të tregojnë më shumë vëmendje ndaj arkeologjisë dhe të investojnë në sajtet kulturore të trashëgimisë. Edhe ne, si vende të BE-së, duhet të fokusohemi më tepër tek vendet e Ballkanit.”
Nga ana e tij, Martin Chiefberger shtoi: “Ishim në Shkodër, Krujë, sot jemi në Korçë, e më pas do të shkojmë në Butrint. Jemi një grup arkeologësh dhe profesorësh që duam të njiheni me historinë tuaj. Një nga gjërat që do veçoja është vëmendja që kërkojnë këto vende arkeologjike nga institucionet. Ne do të përgatisim edhe një raport për Austrinë, që të jetë më e vëmendshme me fonde ndaj vendit tuaj.”
Në të njëjtën linjë është edhe arkeologu shqiptar Olsi Lafe, i cili thekson se rritja e vizitorëve sjell edhe më shumë nevojë për investime, përfshirë fondet europiane:
“Nuk janë vetëm vizitorë të thjeshtë, por profesionistë të arkeologjisë që vijnë në Shqipëri dhe duan të kuptojnë më thellë site si Tuma e Kamenicës. A bëhet mjaftueshëm? Në disa raste po. Por, a duhet bërë më shumë? Patjetër. Investimet në kulturë kërkojnë pasion, vetëmohim, dhe ndoshta nuk të kthehen menjëherë në aspektin ekonomik, por kanë vlera të tjera të pallogaritshme.”
Tuma e Kamenicës është një nga tumat më të mëdha dhe më të njohura në Shqipëri, ku janë zbuluar varre, skelete kockore dhe objekte të shumta arkeologjike si qeramikë, armë, stoli prej bronzi, hekuri, argjendi, ari, qelibari dhe kocke. Ky vendvarrim prehistorik, i shpallur monument kulture i llojit arkeologjik, ka sjellë në dritë rreth 425 skelete dhe mbi 3.600 objekte, duke e bërë një nga pikat më të rëndësishme të trashëgimisë kulturore shqiptare.
