Finalizohet operacioni policor i koduar “Midnight 24”, për goditjen e veprimtarisë kriminale të dhënies ndihmë shtetasve të huaj, kundrejt pagesave, për kalim të paligjshëm të kufirit.
U kap duke transportuar me automjet, 4 emigrantë, kundrejt pagesës, vihet në pranga një 26-vjeçar.
Sekuestrohet një celular dhe automjeti, me të cilin po transportoheshin emigrantët.
Specialistët për Hetimin e Trafiqeve të Paligjshme të DVP Korçë, në vijim të punës për goditjen e veprimtarisë kriminale të dhënies ndihmë shtetasve nga Vendet e Treta, kundrejt pagesës, me qëllim kalimin e paligjshëm të kufirit, drejt vendeve të BE-së, në bashkëpunim me Agjencinë e Mbikëqyrjes Policore Korçë-Elbasan, si dhe me mbështetjen e informacioneve të siguruara nga inteligjenca informative, finalizuan operacionin policor të koduar “Midnight 24”.
Si rezultat i këtij operacioni u vu në pranga shtetasi K. J., 26 vjeç, banues në Tiranë.
Në aksin rrugor “Korçë-Pogradec”, në afërsi të vendit të quajtur Qafë Plloçë, shërbimet e Policisë kanë ndaluar automjetin tip “Toyota”, me drejtues shtetasin K. J. Gjatë kontrollit të ushtruar në automjet u konstatuan 4 emigrantë të paligjshëm, të cilët do të transportoheshin nga ky shtetas kundrejt pagesës, drejt vendeve të BE-së.
Në cilësinë e provës materiale, së bashku me automjetin u sekuestrua dhe celulari i 26-vjeçarit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Njoftimi i policisë;
Korçë: Operacion i sektorit të trafiqeve, arrestohen 4 shtetas.
Mësohet se 4 persona janë kapur gjatë tentativës së transportit të emigrantëve të paligjshëm. Ata janë kapur aksin Korçë-Qafë Thanë, duke patur emigrantë në dy mjete.
Një mjet tjetër mësohet se ka qenë pararojë.
Operacioni u zhvillua gjatë orëve të natës ndërsa materialet kaluan në Prokurorinë e Korçës për veprime të mëtejshme.
