Bashkia Maliq ka ndërmarrë një hap të rëndësishëm drejt promovimit të barazisë gjinore, duke nënshkruar zyrtarisht Kartën Evropiane për Barazinë Gjinore në Jetën Vendore. Përmes këtij akti, Maliqi i bashkohet rrjetit prej mbi 2000 bashkish evropiane që angazhohen për ndërtimin e komuniteteve më të drejta dhe gjithëpërfshirëse.
Krahas nënshkrimit të Kartës, Bashkia Maliq ka shpallur angazhimin për hartimin e Planit Vendor të Veprimit për Barazinë Gjinore, i cili do të përfshijë objektiva të qarta, masa konkrete dhe pjesëmarrje aktive të komunitetit lokal. Ky proces konsiderohet një hap kyç në forcimin e standardeve evropiane dhe në përmbushjen e Strategjisë Kombëtare për Barazinë Gjinore 2021–2030.
Institucioni vendor shprehu mirënjohjen ndaj UN Women Albania dhe Bashkimit Evropian për mbështetjen e vazhdueshme në këtë nismë, duke theksuar se barazia gjinore nuk mbetet vetëm një parim, por një angazhim real për t’u zbatuar në çdo sektor të jetës vendore.
