Bashkia Maliq ka njoftuar se duke filluar nga dita e sotme, të gjitha shërbimet e platformës elektronike e-Albania do të ofrohen falas në sportele të posaçme, të ngritura si në ambientet e Bashkisë Qendër, ashtu edhe në çdo Njësi Administrative.
Ky shërbim synon të lehtësojë aksesin e qytetarëve në dokumentacionin dhe procedurat online, duke ofruar asistencë të dedikuar për çdo kërkesë apo nevojë që kanë banorët e zonës.
“Kushdo që ka nevojë për të marrë shërbimet e-Albania, mund të paraqitet në Bashkinë Maliq, në sportelet përkatëse, apo në Njësitë Administrative, ku do të ketë ndihmë të dedikuar për çdo kërkesë. Mos shpenzo për një shërbim që është falas, eja merre shërbimin tek ne!” – thuhet në njoftimin e Bashkisë Maliq.
Ky hap pritet të përmirësojë ndjeshëm qasjen e qytetarëve ndaj shërbimeve publike dhe të ulë kostot që lidhen me ndërmjetësimin apo shpenzimet shtesë për marrjen e dokumenteve elektronike.
