Bashkia Pogradec, përmes Drejtorisë së Shërbimit Social dhe në bashkëpunim me organizatën ARSIS, ka çelur një kamp veror pesë-ditor, i dedikuar fëmijëve të moshës 7-13 vjeç.
Kampi ka si qëllim të ofrojë një ambient të sigurt dhe miqësor, ku fëmijët të argëtohen dhe njëkohësisht të mësojnë mbi të drejtat e tyre, qytetarinë aktive dhe rëndësinë e vlerave si solidariteti, gjithëpërfshirja dhe pranueshmëria. Përmes lojërave, punës në grup dhe aktiviteteve edukative, synohet të nxitet bashkëpunimi dhe respekti reciprok mes fëmijëve.
Organizatorët theksojnë se iniciativa të tilla janë thelbësore për zhvillimin social dhe emocional të fëmijëve, duke kontribuar në krijimin e një brezi më të ndërgjegjshëm dhe aktiv në komunitet.
“Një fëmijëri e sigurt është themeli i një të ardhmeje me shpresë,” shprehen ata, duke e konsideruar këtë kamp një mundësi të çmuar për t’i ofruar fëmijëve eksperienca të vlefshme, që do t’i shoqërojnë edhe në të ardhmen.
