Bashkia Pogradec dhe Kryetari kanë ndjekur me shqetësim të madh disa deklarata të pavërteta që janë bërë në një emision televiziv në RTSH nga Lindita Pano e cila deklaroi se një fshat i Mokrës është i përfshirë totalisht nga inçesti.
Sigurisht që një deklaratë të tillë e cilësuam që në momentet e para të pavërtetë dhe abuzuese, të pabazuar mbi fakte apo të studime.
Që të dilnim në një qëndrim zyrtar do duhet të merrnim informacionin e duhur nga të gjithë sektorët tanë. Sipas të dhënave nga punonjësit tanë pranë Drejtorisë së Shërbimit Social rezulton se:
Së fundmi apo edhe më herët nuk ka asnjë organizatë, studim, apo raporte studimi mbi këtë fenomen në zonën e Mokrës.
Sektorët tanë nuk kanë asnjë kërkesë, raport apo studim të kërkuar apo paraqitur nga ndonjë organizatë apo institucion tjetër.
Në rast se do të kishte të tilla raporte për këto fenomene ato janë shumë konfidenciale mbi publikimin e të dhënave.
Lindita Pano apo dhe ndonjë organizatë që mund të përfaqësojë nuk kanë kryer asnjë studim sipas të dhënave të deritanishme, për të cilin nëse do të ishte kryer do të duhej të vendosej në dijeni institucioni jonë apo edhe Policia e Shtetit.
Sa më sipër, kërkojmë nga Lindita Pano të distancohet nga deklarata e pavërtetë që ka bërë për banorët e Mokrës, të kërkojë falje publike, ashtu si inkurajojmë organet ligjzbatuese të njoftohen mbi deklaratat e kryera publikisht deri edhe tek AMA mbi median që ka lejuar këtë informacion të përhapet pa u faktuar. Gjithashtu kërkojmë që të merren masa për fshirjen e emisionit dhe çdo materiali të shpërndarë në lidhje me këtë çështje të pavërtetë, fyese dhe denigruese.
Mokra dhe banorët e saj fisnikë e puntorë, janë të troditur dhe të ofenduar mbi këtë deklaratë të pavërtetë dhe të pabazuar mbi fakte e studime, ndaj për këtë minimalja që duhet të bëhet nga deklaruesit është falja publike, më pas institucionet e tjera janë ato që duhet të merren me rastin.
Mokra, mokrarët dhe Pogradeci kanë çfarë ti tregojnë opinionit publik mbi atë që përfaqësojnë në fazat e historisë dhe raste të tilla nuk mund të sfumojnë aspak fisnikërinë e tyre.
Autoriteti i Mediave Audiovizive
Policia e Shtetit Ministria e Shëndetësisë dhe Mbrojtjes Sociale
