Çdo punë e bërë me pasion, edhe pse mund të duket e dalë jashtë kohe, sërish nuk të lë pa të ardhura duke justifikuar mundin dhe sakrificën. E kush më mirë se Besim Lika nga Zvezda e Maliqit mund ta vërtetojë këtë, kur të thotë moshën dhe vitet e punës që ka bërë tërë jetën.
“Kam 60 vjetë që mbarështoj bagëti, sot kam 70 krerë, kam pasur edhe 120 por i kam ulur se u plaka. E bëj sepse e dua këtë zanat, nxjerr të ardhura 5-6 milionë në vit dhe jetoj mirë” thotë Besimi.
Por si kudo në fshatra të tjerë të vendit edhe Zvezda, që ka qenë një nga zonat me të njohura për mbarështimin e bagëtive, sot kjo traditë sa vjen dhe po shuhet.
“Vite më parë Zvezda ka qenë e para për blektori, tani ka rënë, njerzit kanë ikur jashtë shtetit, të rinjtë nuk kanë qejf ta bëjmë këtë punë. Jemi 7-8 veta që e bëjmë ende, unë njëherë kam ndërmend që edhe nja 5 vjet të tjera të vazhdoj”.
Dhe këtë fakt e konstaton me keqardhje edhe bariu 77-vjecar. Sipas tij të rinjtë e sotëm nuk po mendojnë mirë.
“Të rinjtë ikin, unë dy djemtë i kam një në Francë e një në Greqi, por unë skam me çfarë të merrem. Doja shumë që i vogli ta bënte këtë punë, por edhe ai iku”.
Përveç të ardhurave dhe pasionit, besimi këtë punë e bën edhe për të mbajtur veten në formë. Dhe kjo i garanton Zvezdës që edhe për disa vite do ta ketë bariun e saj e bashkë me të edhe bagëtitë që i kullot çdo ditë.
“Unë e bëj edhe për shëndet, nuk më dhemb asgjë në trup, jam gati ti ngjitem malit deri në majë, nuk e kam problem”.
Vit pas viti i gjithë rajoni i juglindjes së vendit po zvogëlon numrin e bagëtive, dhe një nga arsyet është edhe mungesa e njerëzve që të zëvendësojnë barinj si Besim Lika.
