Bie numri i nxënësve në shkollat e arsimit parauniversitar në Qarkun e Korëss. Burime zyrtare pranë Drejtorisë Rajonale të Arsimit Parauniversitar, thanë se këtë vit në klasat e para të juglindjes së vendit do të ketë më pak 228 nxënës. Për këtë arsye sipas të njëjtit burim këtë vit të ri shkollor nuk do të hapen klasa të para në disa shkolla.
Numri më i madh i rënies së nxënësve në klasat e para është në zyrën arsimore Korçë-Pustec. Në qoftë se një vit më parë ka pasur 670 nxënës në klasat e para, këtë vit jo më shumë se 570.
Nga ana e Drejtorisë Rajonale të Arsimit Parauniversitar ne Korçë, bëhet me dije se nuk do të ketë shkolla të mbyllura këtë vit të ri arsimor por burime të siguruara thanë se disa shkolla të ciklit të ulët do të bashkohen me shkolla të tjera.
Në qarkun e Korçë, nën juridiksionin e DRAP Korçë janë 5 zyra arsimore: ZVAP Korçë-Pustec, ZVAP Maliq, ZVAP Devoll, ZVAP Kolonjë dhe ZVAP Pogradec.
Nga informacioni i marrë nga këto zyra rezulton se:
- Numri i regjistrimeve për klasën e parë për vitin shkollor 2023-2024 është: 1526;
- Në vitin e kaluar numri i nxënësve të regjistruar në klasën e pare ka qenë: 1754;
- Këtë vit, nisur edhe nga ndryshiemt ligjore janë regjistruar 110 nxënës në klasën e pare pa mbushur moshën 6 vjeç, por që e mbushin brenda muajit dhjetor.;
- Për shkak të rënies së numrit të nxënësve nuk janë hapur klasat e para në disa shkolla, por nuk kemi mbyllje të shkollave, vetëm një rënie të numrit të nxënësve.
- Nisur nga kjo situate, ka mësues të cilët kanë dalë pa ngarkesë mësimore, por po punohet për mundësinë e sistemimit të tyre me anë të lëvizjeve paralele të detyrueshem, sipas përcaktimeve ligjore.
- Për fillimin e vitit të ri shkollor janë marrë masat përkatëse, duke filluar me paraqitjen e mësuesve në punë dhe sistemimin e mjediseve, pajisjen me tekste falas të të gjithë nxënësve e cila, aktualisht sot është në masën 70%, të nxënësve të regjistruar si edhe me përgatijen e mësuesve për procesin mësimor që do të fillojë ditën e hënë.
- Për këtë vit mësimor të gjitha shkollat janë gati për të pritur nxënësit, me përjashtim të atyre shkollave që janë në rikonstruktim dhe mësimi është zhvendosur në mjedise të tjera.
- Për këtë vit do të ketë 9 shkolla të arsimit bazë ku mësimi do të zhvillohet me turne.
