Aleanca Franceze e Korçës mirëpriti në një takim të veçantë shkrimtarin dhe publicistin frankofon Skënder Sherifi, një autor shqiptar nga Kosova i cili jeton prej dekadash në Belgjikë, por që ka ruajtur me përkushtim gjuhën dhe lidhjet me atdheun.
Takimi mblodhi rreth vetes frankofonë të qytetit, lexues, shkrimtarë dhe të apasionuar pas letërsisë, për të ndarë një bisedë të hapur me autorin, i cili foli për jetën dhe krijimtarinë e tij, sfidat e identitetit dhe kulturës në diasporë, si dhe për librat e tij më të fundit.
Ilia Skëndi, president i Aleancës Franceze në Korçë, theksoi rëndësinë e këtyre aktiviteteve që nxisin dialogun kulturor dhe lidhjet e forta mes qytetit dhe frankofonisë.
Për vetë Skënder Sherifin, takimi në Korçë ishte një përvojë emocionale, në një qytet me histori të gjatë e të veçantë të lidhjes me gjuhën dhe kulturën franceze. Ai u shpreh i lumtur për mundësinë për të ndarë përvojat e tij jetësore dhe letrare me publikun korçar.
