Nëse ka një korçar që i ka fituar të gjitha në afërisht një shekull është Shkëmbi.
Pas dy muajsh mbush plot 44 vjeç, por ka vite që është kthyer në legjendë për Skënderbeun. Në afërsisht një shekull futboll korçar asnjëri nuk ka qenë si ai.
Ky është Bledi Shkëmbi që ka fituar aq shumë trofe, kampionate, Kupa të Shqipërisë dhe superkupa, sa asnjë tjetër.
Duam apo nuk duam, tashmë është fakt që Shkëmbi është më shumë se legjendë. Ka diskutime të shumta për këtë që themi, por fjala legjendë është vërtet e madhe dhe i tillë është Shkëmbi.
Edhe pse ka disa vite që ka lënë futbollin, Bledi kujtohet nga të gjithë, pasi është ai që mori për “dore” Skënderbeun dhe luajti deri në arenën më të madhe të futbollit europian, atë të Champions dhe Europa League.
Bledi Shkëmbi, karierën e nisi me Skënderbeun që me grupmoshat, duke marrë pjesë në të gjitha nivelet e kombëtareve që nga moshat deri te kombëtarja e madhe e Shqipërisë. Ai ka luajtur me Teutën, Ethinikos Asteras, Rijeka, Kamen Ingrad, Kryvas, Partizani, Besa dhe më pas te Skënderbeu moment që shënoi edhe historinë.
Padiskutim më i miri, duke gdhendur me gërma të arta emrin e tij në këtë histori kaq të lavdishme të Skënderbeut.
Përpara disa ditësh mbërriti në Korçë për të luajtur me veteranët dhe të gjithë ata që e panë në fushë i kishte marë malli për kampionin.
Shkëmbi padiskutim që është më i miri! Bledi, je vërtet kampion! Je historia vetë! Je legjenda e Skënderbeut!
