Një çift turistësh zviceranë kanë mbetur të bllokuar në afërsi të Sorokolit në Malin e Korabit. Turistët janë nisur ngjitjen pasditen e djeshme dhe nuk kanë mundur të kthehen pas.
Paraprakisht, dyshohet se janë bllokuar nga ortek dëbore. Njëri prej tyre ka thyer këmbën nga rrëshqitja. Fatmirësisht ata janë lokalizuar mëngjesin e kësaj të hëne, ndërsa pritet ndërhyrja e helikopterit për t’i transportuar drejt Tiranës.
Menjëherë pas marrjes së njoftimit, për kërkimin e dy turistëve zviceranë, të bllokuar pranë malit të Korabit, u nisën 7 forca të policisë së rendit, 2 forca të policisë kufitare dhe disa banorë të zonës së njësisë administrative Kala e Dodës.
Dy turistët u gjetën në orët e para të mëngjesit të sotëm.
Stukturat Kombëtare të Mbrojtjes Civile, në bashkëpunim edhe me Policinë e Shtetit janë angazhuar në orët e para të mëngjesit për të vlerësuar mënyrën e ndërhyrjes, për shkak të terrenit të vështirë.
Në këto momente po fillon operacioni i shpëtimit, me tërheqje nga lartësia, në bashkëpunim edhe me KFOR.
