Bashkia e Pogradecit rezulton ndër bashkitë e cila në periudhën e qeverisjes së Artan Shkëmbit ka krijuar një borxh shumë të madh ndaj të tretëve duke mos shlyer shërbime të caktuara apo investime të kryera.
Borxhe të cilat i trashëgoi në qeverisjen e tij 4 vjeçare Eduard Kapri dhe vijojnë edhe sot në qeverisjen e Ilir Xhakollit. Ky i fundit thotë se vazhdimisht janë përpjekur të shlyejnë një pjesë të borxhit dhe nga 4.5 miliardë që kanë qënë, kanë arritur në nivelin e 2.5 miliardëve.
Por pavarësisht kësaj sërish bashkia rezulton ndër bashkitë me vështirësi financiare dhe për këtë Xhakolli thotë se ka kërkuar nga qeveria të ndërhyjë, pasi me mundësitë e saj bashkia nuk mund t’i shlyejë.
“Duhet të kuptojmë se ne jemi votuar për të investuar, zhvilluar qytetin dhe fshatrat, nuk jemi votuar të shlyejmë borxhet. Edhe pse kemi punuar që ta ulim nivelin e tij, sërish mundësitë e kësaj bashkie këto janë. Ndaj kemi kërkuar që qeveria të ndërhyje dhe kemi shpresë se deri në fund të vitit do ta kemi zgjidhur këtë situatë, e cila për hir të së vërtetës na pengon edhe ne të vijojmë normalisht punën dhe investimet”
Kështu i është përgjigjur Xhakolli pyetjes së këshilltarëve bashkiakë në mbledhjen e radhës.
Por problemi më i madh në këtë rast për bashkinë janë vendimet gjyqësore, sepse në rast se ato nuk shlyhen si pas vendimit, borxhit i shtohen kamata. Prandaj edhe në rastet kur bashkia arrin të shlyejë një pjesë, vendimet gjyqësore i rritin për subjektet e pashlyera.
Ndaj shikohet e udhës që: ose qeveria të ndërhyjë me grand për shlyerje ose t’i hapet rruga një kredie e cila do të bënte shlyerjen e të gjithë borxheve e më pas nuk do përballeshim me pagesa kamatash por vetëm me pagesën e kësteve mujore të kredisë.
Kështu shpresohet që ti jepet frymëmarrje bizneseve që kanë para për të marrë ashtu siç hiqet një barrë e rëndë e buxhetit të kësaj bashkie.
