Në një atmosferë të mbushur me emocione dhe art, tre shkollat artistike në varësi të DRAP Korçë në kujdesin e Drejtoreshës së DRAP Korçë znj.Vinjola Rota , bashkuan talentin dhe pasionin për të nderuar figurën e mësuesit me edicionin e tretë të koncertit festiv “Buqetë tingujsh e ngjyrash”. Ky event, tashmë i kthyer në një traditë të çmuar, solli në skenë një mozaik të pasur interpretimesh muzikore, koreografike dhe pikturale, duke shprehur mirënjohjen dhe dashurinë për ata që ndriçojnë rrugën e dijes.
Në këtë program të veçantë, nxënësit e shkollave artistike dhuruan emocione të paharrueshme përmes ekzekutimeve muzikore të përzgjedhura me kujdes. Pikturat dhe instalacionet artistike të ekspozuara në ambientet e aktivitetit përçonin mesazhe të fuqishme mbi rolin e mësuesit si udhërrëfyes në formimin e brezave të rinj.
Ky edicion shënoi një tjetër sukses, duke treguar se arti dhe edukimi janë të pandashëm dhe se kontributi i mësuesve në kultivimin e talenteve të reja është i paçmuar. Falënderime dhe respekt për të gjithë mësuesit, frymëzuesit tanë të përjetshëm!
