Gjykata e Korçës ka dhënë masën e sigurisë arrest me burg për Dritson Kurtin i cili u arrestua nga policia e Korçës tre ditë më parë me akuzën e marrëdhënies seksuale me të mitur.
Prej një viti 21 vjeçari ishte i martuar me një 14 vjeçare me të cilën ka sjellë në jetë një fëmijë.
Në momentin kur 14 vjeçarja është shoqëruar nga bashkëshorti dhe familjarët ka shkuar në martenitetin e Korçës për të lindur, Shërbimi mjekësor i shtëpisë së lindjes për procedurë nisur nga mosha e minorenes ka lajmëruar policinë,të cilët kanë kryer arrestimin e Dritson Kurtit.
Familjarët e 21 vjecarit por edhe ata të 14 vjeçares kanë qenë kundër këtij arrestimi me pretendimin se kjo është traditë e këtij komuniteti.
Njoftimi i Prokurorisë;
Përshëndetje të gjithëve!
Nisur nga interesi i treguar prej Jush për rastin
bëjmë me dije se:
Në Gjykatën e Shkallës së Parë e Juridiksionit të Përgjitshëm Korçë, u zhvillua sot në datën 10.09.2024 ora 09:30 seanca me objekt: “Vleftësim ndalimi, caktim mase sigurimi”, ndaj shtetasit D.K i dyshuar për kryerjen e veprës penale “Marrëdhënie seksuale ose homoseksuale me të mitur”, parashikuar nga neni 100/2 i Kodit Penal, ku gjykata në përfundim vendosi: Pranimin e kërkesës.
Vleftësimin si të ligjshëm të ndalimit dhe caktimin e masës së sigurimit “Arrest në burg” për këtë shtetas.
Ju faleminderit!
