Në një ngjarje të veçantë akademike, Fakulteti i Shkencave Natyrore dhe Shkencave Humane në Universitetin “Fan S. Noli” të Korçës mirëpriti filozofin e njohur italian, Prof. Giuliano Di Bernardo, i cili mbajti një ligjëratë të hapur me temën “Burimet ezoterike të filozofisë”.
Në këtë ligjëratë, Prof. Di Bernardo prezantoi disa nga idetë kryesore të librit të tij më të fundit, duke sfiduar narrativën tradicionale mbi lindjen e filozofisë perëndimore. Ai argumentoi se rrënjët e filozofisë nuk qëndrojnë vetëm në racionalitetin e Greqisë së Lashtë, por edhe në traditat ezoterike dhe mistike të Lindjes së Mesme, të cilat kanë ushqyer mendimin filozofik përmes simboleve, riteve dhe dijes së fshehtë.
Prof. Giuliano Di Bernardo, një prej figurave më të shquara të filozofisë bashkëkohore dhe profesor i Filozofisë së Shkencës në Universitetin e Trentos në Itali, solli për audiencën korçare një qasje origjinale dhe provokative mbi historinë e ideve, duke hapur një horizont të ri reflektimi për studentët, studiuesit dhe pedagogët.
Dr. Suela Dinellari, përgjegjëse e Departamentit të Shkencave Sociale, e vlerësoi ligjëratën si një mundësi të rrallë për përballjen me mendimin bashkëkohor filozofik nga një prej mendimtarëve më të rëndësishëm të kohës sonë.
Pjesëmarrësit ndoqën me interes këtë ligjëratë frymëzuese, e cila solli një perspektivë të re mbi lidhjen mes dijes filozofike dhe burimeve të saj të thella kulturore, shpirtërore dhe simbolike.
