Çulin nuk e duroj dot. Sidomos kur ulem për kafe nga Pazari, fillon dhe flet pa pushim e bëhet i bezdisur. Vjen era raki, disa herë i palarë, kërkon lëmoshë.
Sot isha shumë i lodhur, po ecja në pedonale dhe pashë Culin që po kërkonte cigare. Unë nuk e pi duhanin por vendosa t’i merrja dikujt që po pinte kafe në Irish Pub e t’ia jepja. Po kërkonte pa thirrur, i qetë, nuk ishte llafazan, ishte i larë, si tjetër njeri sot.
- Xh: Mirë mo, se të tërë Çuli të thonë, po emrin askush s’ta di. E mban mend emrin tënd apo hiç?
- M: Ue. Budalla më di mua o? Mersur Goskova. Nga Goskova e Korçës jam.
- Xh: Po ti si budalla shtiresh, pastaj gjithë herët kur unë të shoh, je i pirë.
- M: U mërzite ti se pi unë ë?
- Xh: Jo bre Çuli, po je më i mirë i papirë.
- M: E di, se kështu më japin më shumë cigare e lek, po s’më rrihet pa pirë. E kam mësuar kur me vdiq babai.
- Xh: Nga se vdiq yt atë?
- M: Nga mamaja. E çmendi ajo. Pastaj u plak dhe vdiq.
- Xh: Po ç’ne që je larë sot, nuk ke pirë, nuk thërret? Si më ndryshe sot.
- M: Ka zgjedhje mo. Kur më vijnë në lagje, u jap ato numrat e kartës së identitetit. Edhe më japim ngahera, kush 10, kush 20-çe.
- Xh: Po pse lahesh?
- M: Lahem që të më besojnë që do vete te votoj bre. Se po piva thonë ; “Ky budallai nuk di të votojë”. Kështu më besojnë që jam në metro.
- Xh: Mirë o Çuli mirë. Vetëm mos thërrit më.
- M: Do thërras!
- Xh: Pse?
- M: Po do mbarojnë o zgjedhjet…
Shkroi: Xhensil SHKËMBI
