Dean Liço i ka dhënë sot lamtumirën klubit të Igdir në kategorinë e dytë turke, për t’iu bashkuar një tjetër skuadre në futbollin turk, Bolusporit. Klubi në fjalë ka pretendime për ngjitjen në elitë dhe ka përforcuar radhët me mesfushorin shqiptar i cili ka lënë shenjë në vetëm 6 muaj në Turqi.
“Faleminderit Igdir dhe tifozëve për të gjithë momentet që kemi kaluar bashkë, ju uroj më të mirën”, ishin fjalët e Liços në një postim në rrjetet sociale duke i dhënë lamtumirën skuadrës që bëri të mundur kalimin e tij nga Skënderbeu në kampionatin turk.
Ndërkohë, trajneri i Boluspor, Ufuk Kahraman, nuk ak kursyer elozhet teksa ka shpjeguar se pse kishte zgjedhur Liçon për ta blerë nga Igdir.
“Afrimet janë lojtarë që përshtaten me sistemin tonë të lojës. Liço është një lojtar kontakti agresiv, i cili mund të luajë në tranzicion dhe gjithashtu di të mbajë topin” shpjegoi ai arsyen pse ishte afruar futbollisti shqiptar në radhët e skuadrës së tij.
