Korça është kthyer në kryeqendrën e festimeve në periudhën e festave të fundvitit. Të shumtë janë ata që zgjedhin qytetin juglindor për të festuar Krishtlindjen dhe vitin e ri, për atmosferën e bukur që krijohet në qytet.
Qyteti i festave do të jetë edhe më i bukur këtë fundvit me dekorin festiv që është duke u vendosur. Prej disa javësh punonjësit e ndërmarrjes së shërbimeve publike kanë nisur punën për vendosjen e zbukurimeve për t’i dhënë Korçës një atmosferë festive.
Risi për dekorin e këtij fundviti do të jetë vendosja e një bredhi të ri me përmasa akoma më të mëdha se ai i vitit që shkoi. Bëhet fjalë për një strukturë metalike me një bazament me diametër 10 metra dhe lartësi 16 metra. Ndërkohë që nuk do të mungojë edhe këndi i lojërave për fëmijët, që do të gjallërojë qendrën e qytetit. Një tjetër risi për këtë fundvit është edhe ndriçimi i gjithë fasadës të godinës së bashkisë Korçë, teksa globi i ndiçuar me drita kësaj here është pozicionuar tek sheshi para teatrit.
Nuk do të mungojnë zbukurimet dhe dritat edhe tek Pazari i Vjetër i cili këtë vit vjen me një dekor ndryshe, e po ashtu edhe zbukurimet e shumta në rrugët kryesore e sheshet e gjithë qytetit. Ndërkohë që një kalendar i pasur me aktivitete artistike e kulturore do të zhvillohen gjatë muajit dhjetor.
