Nga Ledjan Zeqollari/HARTA E POGRADECIT (1944)
Një hartë e rrallë e Pogradecit e projektuar gjatë Luftës së Dytë Botërore nga Zyra e Luftës së Shtabit të Përgjithshëm në Britaninë e Madhe, dhe e publikuar në vitin 1944. Në hartë dallohen toponime dhe objekte që sot nuk ekzistojnë. Në pjesën veriperëndimore të hartës dallohet Lumi i Qytetit i cili askohe është shënuar me emrin “Përroi i Kishës” dhe lidhet me emrin e Kishës së Shën e Dielës e cila ndodhet në pjesën perëndimore (Nr. 1). Gjithashtu dallohet edhe Lumi i Vërdovës (Nr. 2) dhe në afërsi të tij ekzistenca e një kishe e cila i takon të jetë Kisha e Shën Prokopit. Kjo ishte një nga kishat më të vjetra, e ndërtuar në shekullin XV dhe e prishur në vitin 1967. Një prej ikonave të saj, e pikturuar nga Kostandin Shpataraku, ndodhet sot në Muzeun Kombëtar “Gjergj Kastrioti” në Krujë. Po ashtu midis dy lumenjëve dallohet dhe një shenjë konvencionale, me ngjyrë blu, e cila përkon me vendin ku sot quhet “Përroi i Çaprazit” (Nr. 3). Kjo lidhet me ekzistencën e një përroi të vogël, me të njëjtin emër, i cili sot nuk ekziston më pasi shtrati i tij u sistemua gjatë periudhës së komunizimit kur qyteti filloi të zgjerohej sidomos në pjesën jugore të tij.
Arkivi i Universitetit McMaster, Hamilton, Ontario, Kanada.
