Në fshatin Menkulas të Devollit aty ku lindi dhe jetoi shkrimtari i madh Dritëro Agolli, sot si për ironi të fatit nuk ka asnjë gjurmë të tij.
E vetmja ndërtesë që u projektua për të qenë shtëpi-muze sot është kthyer në një ngrehinë që nuk ka asgjë të përbashkët me atë se çfarë duhej të ishte në të vërtetë. Nëse futesh brenda saj e pakta që konstaton është se ajo sherben si banjë publike. E turpshme dhe e trishtë por një e vërtetë që duhet besuar.
Teksa endemi nëpër godinën që duhej të ishte një muze dhe nëse do ishte e tillë do kishte me mijra vizitorë, takojmë Sami Begollin është një nga miqtë e vjetër të Dritëroit. Ai sot ndihet i lodhur nga çdo gjë dhe nuk ka besim se dikush do ta ndërtojë përsëri muzeun siç u projektua, ndërsa refuzon të flasë rreth saj.
Por nuk nguron të shprehet se Menkulasin askush nuk do ta vizitonte nëse nuk do të ishte Dritëroi nga ky fshat, fshat i cili nuk po ja kthen dot nderin sepse nuk gjenden ca para nga Ministria.
Avni Hoxha 92 vjeç, tregon se një figurë të shquar si Dritëroi nuk po i jepen vlerat e duhura dhe mjaft i revoltuar kërkon të përfundohet shtëpia-muze kjo është kërkesa për mikun e tij që nga fëmijëria.
Vazhdimisht kryetari i Bashkisë Devoll ka thënë se projekti për rikonstruksionin e kësaj ndërtese është gati, por bashkia e Devollit nuk ka buxhetin për ta financuar dhe për këtë prej vitesh është duke pritur financim nga Ministria e Kulturës.
Por deri sa financimi të gjendet, Menkulasi duhet të krenohet vetëm me regjistrin e gjendjes civile që vërteton se i madhi Dritëro Agolli ka lindur në këtë fshat, pasi as banesën e shkrimtarit nuk e identifikojnë dot me emrin e tij.
