Atmosferë festive, ngjyra, emocione dhe një ndjenjë e fortë përkatësie mbizotëruan sot në ambientet e Shkollës 9-vjeçare “Muharrem Veizi”, ku u organizua aktiviteti “Dita e Hapur”, në kuadër të nismës Shkolla si Qendër Komunitare.
Aktiviteti mblodhi së bashku nxënës, mësues, prindër dhe ish-nxënës të shkollës, në një ditë të dedikuar promovimit të vlerave të bashkëpunimit, traditës, artit dhe sportit. Oborri i shkollës u kthye në një hapësirë të gjallë dhe ndërvepruese, ku pjesëmarrësit shijuan një sërë aktivitetesh të larmishme.
Në kuadër të ditës festive u zhvilluan ekspozita me piktura dhe lule natyrale, ku nxënësit treguan kreativitetin dhe ndjeshmërinë artistike. Pjesë e aktibotetit ishte edhe panairi i librit, i cili promovoi leximin dhe kulturën si pjesë e rëndësishme e edukimit.
Gjithashtu u organizua panairi i ushqimeve tradicionale, që solli në vëmendje gatimet autentike të zonës, të përgatitura nga vetë prindërit dhe komuniteti. Nuk munguan edhe aktivitetet sportive dhe lojërat kolektive, që nxitën frymën e bashkëpunimit dhe argëtimit në grup, si dhe performanca artistike me këngë dhe valle, të interpretuara nga nxënësit, të cilat u pritën me entuziazëm dhe emocione nga të pranishmit.
Përmes këtij aktiviteti, shkolla synoi të forcojë rolin e saj si një qendër e hapur dhe dinamike në shërbim të komunitetit, ku çdo individ ka mundësinë të japë kontributin e vet dhe të ndjejë përkatësi.
Drejtuesit e shkollës shprehën mirënjohje për angazhimin e të gjithë aktorëve pjesëmarrës, duke theksuar rëndësinë e aktiviteteve të tilla në rritjen e komunikimit dhe bashkëpunimit midis shkollës dhe familjes.
“Dita e Hapur” në Shkollën “Muharrem Veizi” u mbyll me duartrokitje dhe buzëqeshje, duke lënë pas një ditë të mbushur me energji pozitive dhe kujtime të bukura për të gjithë.
