Më 31 maj 2025, ora 19:00, në ambientet e Teatrit “Andon Zako Çajupi” në Korçë, do të organizohet një mbrëmje poetike me rastin e publikimit të librit të fundit të poetit të njohur Skënder Rusi, me titull “Ditët e mia pa ty”. Ky aktivitet mbahet në kujtim të ndarjes nga jeta të poetit, një figurë e spikatur e letërsisë lirike shqiptare.
Ngjarja është organizuar nga Qendra e Artit dhe Kulturës në bashkëpunim me shtëpinë botuese Toena, dhe do të sjellë për publikun interpretime artistike të përzgjedhura nga krijimtaria e librit më të ri të poetit.
Në skenë do të interpretojnë emra të njohur të artit skenik shqiptar si Zamira Kita, Egla Ceno, Blerta Belliu, Kristian Koroveshi dhe Antonio Tole.
Libri “Ditët e mia pa ty” vjen si një reflektim i ndjerë mbi humbjen, kujtimin dhe dashurinë, duke dëshmuar edhe një herë aftësinë e Skënder Rusit për të prekur shpirtin e lexuesit përmes vargjeve të tij të ndjera.
Të gjithë dashamirët e poezisë dhe artit janë të mirëpritur në këtë mbrëmje të veçantë letrare, e cila premton emocione, kujtime dhe një rikthim te fjala poetike që mbetet e pavdekshme.
Skënder Rusi, një nga zërat më të ndjerë të poezisë shqiptare, la pas një trashëgimi të vyer letrare. Libri “Ditët e mia pa ty”, i sapodalë nga shtypi, është vepra e tij e 26-të, dorëshkrimi që ai la pas si një testament dashurie për jetën, për fjalën, për artin.
