Ish-deputeti demokrat, Ervin Salianji, ka treguar për herë të parë me detaje përjetimet e tij gjatë qëndrimit në burgun e Fierit, ku vuajti një dënim prej 10 muajsh. I ftuar në një intervistë televizive, ai foli për kushtet e rënda dhe sfidat që përjetoi pas hekurave.
Salianji e përshkroi jetesën në qeli si jashtë çdo standardi njerëzor, ku mungesa e ujit të rrjedhshëm e detyronte të lahej me kanaçe. Sipas tij, ambienti ishte i ngushtë dhe nuk kishte as mundësi minimale për t’u ndjerë i qetë. “Në fillim, instinktivisht kërkova telefonin, por aty kuptova realitetin e ri. Televizori? Ishte aq i vogël, sa mezi dalloje figurat”, u shpreh ai.
Pavarësisht kushteve të vështira, Salianji tregoi se me kalimin e kohës u mësua me rregullat dhe mënyrën e jetesës në qeli. Ai theksoi se nuk ndjeu kurrë vetmi, pasi bashkëvuajtësit e pritën me entuziazëm dhe e mbështetën. Madje, ata shpesh e brohorisnin dhe e konsideronin burgosjen e tij si një padrejtësi politike.
Dënimin për kallëzim të rremë ai e konsideron si një akt politik, që e përjashton nga aktiviteti politik për 5 vite. Megjithatë, Salianji paralajmëroi se do të nxjerrë një libër ku do të rrëfejë të gjitha përjetimet në burg, si dhe një dokumentar që do t’i sjellë publikut një pasqyrë të qartë të atyre muajve.
