Për të dytën herë fermerët e fushës së Maliqit dhe jo vetëm kanë protestuar në aksin nacional Korçë – Pogradec.
Shkak i protestës së tyre është bërë mosshitja e prodhimeve bujqësore si gruri, misri e patatja, kultura këto që zënë sipërfaqen me të madhe të kësaj fushe.
Edhe njëherë tjetër fermerët maliqarë kanë kërkuar ndërhyrjen e ministrise se linjës por dhe të qeverisë për të gjetur rrugën e duhur të ruajtjes së ekuilibrave import – eksport, pasi sipas tyre kulturat bujqësore që vijnë nga vendet e rajonit e më gjerë kanë dëmtuar shitjen e prodhimeve vendase.
Edhe kësaj here në mbështetje të fermereve kanë dalë shoqata e biznesit të vogël e të mesëm të Shqipërisë. Nënkryetari i kësaj shoqate i ka kërkuar qeverise të marrë masa të menjëhershme për shitjen e prodhimeve vendase e ka paralajmëruar për përshkallëzim të protestave.
Të njëjtën gjë kanë kërkuar edhe fermerët potenciale e superpotenciale të cilët me këto kultura kanë sipërfaqe shumë të mëdha.
Fermerët janë shprehur se ka patur presion nga ana e policisë duke mos i lejuar të nxjerrin mjetet e tyre bujqësore, ndërkohë që herën e kaluar ata u gjobiten me gjoba deri në 1 milion lek të vjetra.
