Edicioni i 20-të i Festës së Birrës në Korçë ka mbledhur mijëra vizitorë vendas dhe të huaj në eventin më të madh kulturor e turistik të juglindjes, i cili zhvillohet përgjatë pesë netëve festë në qytet.
Aktiviteti bashkon muzikën, traditën dhe atmosferën karakteristike të zonës, duke u kthyer ndër vite në një simbol që tërheq çdo vit e më shumë turistë. Në natën e tretë të këtij organizimi jubilar, skena kryesore priti artistë të njohur të muzikës shqiptare si Devis Xherahu, Aurela Gaçe dhe Ledri Vula, të cilët performuan përpara publikut deri në orët e vona. Pjesë e eventit janë edhe stendat e kompanive të ndryshme të birrës të vendosura në hapësirën festive.
Përshtypjet e vizitorëve dhe pritshmëritë për fundjavën
Pjesëmarrës nga qytete të ndryshme të Shqipërisë dhe rajoni kanë ndarë përshtypjet e tyre për organizimin. “Jam nga Struga, atmosfera është shumë e bukur”, tha një vogëlush i pranishëm në festë. Një vizitor nga kryeqyteti u shpreh: “Jam nga Tirana, viti i parë që vij. Është shumë bukur”, ndërsa një tjetër qytetar po nga Tirana theksoi se “Organizimi është perfekt”. Po ashtu, një tjetër pjesëmarrës pohoi: “Kam ardhur nga Lushnja vetëm për këtë festë”.
Kulmi i Festës së Birrës pritet të arrihet gjatë fundjavës, kur në skenë do të ngjiten të tjerë emra të njohur të muzikës. Me përfundimin e pesë netëve do të mbyllet zyrtarisht ky edicion i 20-vjetorit, i cili ka sjellë një gjallëri të jashtëzakonshme dhe ka forcuar identitetin turistik të Korçës.
