Pasionet e njerëzve janë nga më të ndryshmet. Por një 80 vjeçare në Korcë duket se i tejkalon pritshmëritë e kujtdo. Kimete Bylykbashi ka vendosur të nxjerrë në pah,atë se cfarë dinë më së miri të bëjnë korcarkat, pastërtinë dhe bukurinë.
E moshuara është me origjinë nga Suhareka e Kosovës, prej vitesh jeton në qytetin e Korçës. Në jetën e saj ajo ka hasur shumë vështirësi por që e kanë bërë edhe më të fortë. Pasioni i veçantë që ajo ka, janë lulet.
80 vjeçarja ka krijuar e vetme një lulishte të vogël në lagjen ku banon në Korçë. Një lulishte që mesa duket ka tërhequr vëmendjen e qytetarëve të cilët nuk humbin rastin ta përgëzojnë. I trishtë mbetet për të fakti se si ajo ka vazhduar “traditën” e luleve pas bashkëshortit të saj i cili nuk jeton më.
Kimetja tregon se si vendosi të vijonte përkujdesjen mbi lulet e shumëllojshme pasi ideja e kopshtit ka qënë e të shoqit.
“I kishte shumë qejf trendafilat. Donte t’i hidhte pleh por u sëmur dhe u shtrua në spital. I thashë, t’ja hedh unë plehun luleve por më tha jo. Kur të dilte nga spitali do t’ja hidhte vetë. Pas 2-3 ditësh vdiq. Nga ajo që më tha se do ta bënte vetë më ka shtyrë që të punoj më shumë në kopësht”
Kënaqësia e madhe që lulet i japin të moshuarës nuk ka të krahasuar. Një ndjesi që sipas saj përçohet edhe tek banorët e tjerë të lagjes. Çdo mëngjes Kimetja del nga shtëpia dhe shkon tek lulishtja modeste, por tepër me vlera për t’u kujdesur për lulet. Duke filluar nga ujitja e tyre e deri tek prerja e luleve të dëmtuara apo të thara.
