Bashkia e Korçës ka ndërhyrë sot ndaj një biznesi që operon në pedonalen e qytetit, pasi ky i fundit nuk kishte zbatuar urdhrin për heqjen e strukturave metalike.
Lazjon Petri, këshilltar i pavarur në Këshillin Bashkiak të Korçës, ka dalë në mbështetje të këtij subjekti dhe bizneseve të tjera të prekura nga vendimi. Ai e cilëson ndërhyrjen si të papërshtatshme, veçanërisht në kulmin e sezonit turistik, duke e konsideruar si një “pamje të shëmtuar për qytetin”. Sipas Petrit, urdhri nuk ka bazë të qartë ligjore.
Ndërkohë, burime nga Policia Bashkiake dhe Inspektorati i Mbrojtjes së Territorit bëjnë me dije se prishjet do të vijojnë për të gjitha bizneset që kanë refuzuar zbatimin e urdhrit, ndërsa këtyre subjekteve nuk do t’u jepen më leje provizore për shfrytëzimin e hapësirave publike.
