Në takimin e radhës zhvilluar me banorët e lagjes 14 të qytetit të Korçës, kryetari i Bashkisë Sotiraq Filo, njëherazi kandidat në zgjedhjet vendore të 14 majit për këtë bashki, ka prezantuar një prej projekteve më madhore që pritet të nisë mandatin e ardhshëm. Gazifikimi i plotë i Korçës, sipas Filos tashmë është një fakt që ka marrë rrugën e investimit, dhe pritet të zgjidhë një problematikë kryesore për ngrohjen e një qyteti të ftohtë si Korça. Një projekt ky që ul ndjeshëm koston e shpenzuar për ngrohje dhe mbron mjedisin.
“Pas zgjidhjes së furnizimit me ujin e pijshëm, kanalizimeve të ujrave të përdorura dhe shtrimin e rrugëve në gjithë qytetin, me projektin e gazifikimit përmbyllet projekti i infrastrukturës, duke e kthyer Korçën në qytetin e parë me infrastrukturë me standard Europian. Jemi në një qytet të ftohtë ku kostot e ngrohjes janë të rëndësishme për buxhetin e çdo familje. Ky projekt synon ta zgjidhë këtë problem duke dhënë zgjidhje të përballueshme ekonomikisht por edhe të mbrojë mjedisin. Diçka e tillë pritet t’u japë dorë bizneseve duke ulur kostot për ngrohje dhe duke hapur rrugën e punësimit të më shumë njerëzve.” tha Filo
Për drejtuesin politik të qarkut të Korçës, Ministrin e Mbrojtjes Niko Peleshi, Korça ia ka dalë të bëhet një qytet që ofron mrekulli në fushën e turizmit duke e përciellë edhe në sektorë të tjerë. Tani sipas Peleshit sfida mbetet lidhja e tregut të punës me kushtet që ofron qyteti.
“Turizmi i fundjavës dikur nuk ekzistonte, jo këtu por në asnjë vend tjetër, por ne ia dolëm dhe me punën e përbashkët arritëm të bëjmë këtu një mrekulli të vogël. Duhet që të njëjtin sukses ta përsërisim edhe në fusha të tjera të rëndësishme. Ka një program të jashtëzakonshëm për të ndërtuar një pol zhvillimi siç është bujqësia, agroturizmi dhe edukimi me teknologjitë e reja. Korçën e kemi të bukur dhe të jetueshme, nëse lidhim tregun e punës me jetesën e shkëlqyer këtu ne ia kemi dalë.” Theksoi Peleshi
