Në ambientet e Shkollës së Mesme Artistike “Tefta Tashko Koço” në Korçë u mbajt koncerti i tretë i turit muzikor “Fizarmonika në udhëtim”, organizuar nga Dega e Fizarmonikës Klasike pranë Universitetit të Arteve.
Pedagogë dhe studentë interpretuan vepra të njohura të muzikës së dhomës, duke sjellë për publikun një repertor të pasur që përfshinte kompozitorë klasikë dhe bashkëkohorë.
Mes qëllimeve kryesore të këtij aktiviteti ishte promovimi i fizarmonikës si instrument dhe nxitja e interesit të të rinjve për ta përfshirë në rrugëtimin e tyre artistik.
Pedagogët Elton Balla dhe Erand Kurani theksuan rëndësinë e këtij turi për edukimin muzikor të brezave të rinj dhe për afrimin e tyre me botën e interpretimit dhe pasionin për muzikën.
Turneu do të vijojë në qytete të tjera të Shqipërisë, si një ftesë për të rinjtë që të zbulojnë bukurinë e fizarmonikës dhe të ndërtojnë lidhje më të forta me artin.
