E ndodhur në kushte jo fort të mira emocionale dhe psikologjike, motra e Egli Podës është shprehur e revoltuar ndaj ngjarjes së ndodhur. Ajo kërkon llogari nga shteti dhe Policia.
Sipas saj policia fshehu ngjarjen dhe mbuloi gjurmët. Nuk bëri as detyrën më minimale që i takonte.
Ja çfarë thotë ajo;
“Më ka marrë në tel djali i tezes dhe na tha të shkonim urgjent në spital. Aty pashë vëllain tim të shtrirë dhe të masakruar, dhe mjekët që po i jepnin ndihmën e fundit.
Asnjë nga ne familjarët nuk e pranonin këtë që kishte ndodhur, deri sa u dorëzuan mjekët.
Dola jashtë, ishte plot me polica dhe thashë çfarë ka ndodhur dhe më thonë se ishte rrëzuar. Nuk më thanë se kishin filluar hetimet për diçka tjetër.
Policia lëvizi shumë vonë, kjo do të thotë se kanë qenë në lëvizje nga të tjerët për t’u sjellë kështu. Mirë që nuk lexova mediat që thoshin se vdiq i dehur.
Dallohej qartë që ishte i dhunuar por nuk thuhej nga askush që ishte bërë një vrasje. E kishin masakruar në tufë dhe hedhur në rrugë. E kishin braktisur dhe e kishin lënë.
Ambulanca kishte shkuar me vonesë, ishte lajmëruar prej gjysëm ore. Policia nuk pranonte të lëvizte trupin. Ai mbase ishte gjallë dhe mund të shpëtonte.
Egli ishte njeriu më i mirë, çuni më i dashur, ishte familjar dhe punonte shumë. Sa mbylli lokalin e tij mund ta kenë provokuar, mund ta kenë ngacmuar dhe pastaj e kanë vrarë.
Ishte vrasje në bashkëpunim, ishte në bashkëpunim me shtetin që ka pritur, ka fshehur ngjarjen.
Aty kalonin makina, nuk kishte shirita, njerëzit pinin kafe. E bënë me gjakftohtësinë më të ftohtë. Ka shumë vrasës, nuk është një vrasës.
Kjo sapo ka filluar dhe askush mos zgjasë duart të bëhet palë, nëqoftë se dikush guxon të bëhet pjesë e padrejtësisë e gënjen mendja.
Kërkoj të hetohet çdo gjë në detaje. Çdo kafshë, çdo bastard që e ka bërë këtë masakrim duhet të mbajë përgjegjësi!” – ka thënë ajo.
