Në datën 25 tetor 2023, Shkodra u bë qendra e një ngjarje të rëndësishme në botën e bimëve mjekësore dhe aromatike (BMA) në Shqipëri. Forumi “Institucionet e Infrastrukturës së Cilësisë në Shqipëri dhe Ndërmarrjet e Vogla dhe të Mesme kontribuojnë në rritjen e ndërgjegjësimit për Cilësinë dhe Standardet në Sektorin e Bimëve Mjekësore dhe Aromatike” u organizua në ambientet e “Shporta e Recit”, Malësia e Madhe. Ky forum u organizuar në kuadër të projektit Global and Quality Standard Program (GQSP), një projekt i financuar nga Qeveria e Zvicrës në kuadër të Sekretariatit të saj Shtetëror për Çështjet Ekonomike SECO dhe implementuar nga Organizata e Kombeve të Bashkuara për Zhvillim Industrial (UNIDO). Qëllimi i këtij program eshte krijimi i një sistemi të qëndrueshëm të standardeve për Ndërmarrjet e Vogla dhe të Mesme (NVM) në sektorin e BAM. Kjo synonte rritjen e eksporteve dhe përmirësimin e cilësisë së produkteve të ofruara nga ky sektor.
Qëllimi kryesor i forumit ishte ndarja e rezultateve paraprake të një vlerësimi të gjerë që ishte kryer në sektorin e BMA dhe laboratoreve të cilësisë në Shqipëri. Ky vlerësim paraqiti situatën aktuale të bizneseve vendase në këtë sektor, duke identifikuar nevojat dhe sfidat me të cilat ballafaqohen ato. Gjithashtu, në fokus ishte edhe analiza e laboratorëve në vend, sfidat dhe mundësitë në respektimin e standardeve të cilësisë. Duke iu kushtuar kësaj analize thelbësore, u referuan disa çështje kyçe që kanë të bëjnë me praktikat laboratorike dhe cilësinë e punës në këto ambiente.
Në diskutimet e forumit u theksua roli i akreditimit në zinxhirët e vlerës së bujqësisë. U diskutua se si standardizimi mund të përmirësojë koordinimin mes palëve të interesuara, duke filluar nga ferma deri te tregu. Po ashtu, u bë e qartë rëndësia e përmbushjes së standardeve të cilësisë dhe sigurisë për të siguruar qasje në tregjet vendore dhe ndërkombëtare. Diskutimet theksuan edhe rolin e proceseve të testimi, inspektimit dhe certifikimit në ruajtjen e standardeve të cilësisë, duke vënë në pah nevojën për kornizat ligjore kombëtare dhe agjencitë përgjegjëse për zbatimin e standardeve të cilësisë në sektorin e bujqësisë.
Ky forum nuk ishte vetëm një takim, por një hap konkret drejt ndryshimeve të rëndësishme në industrinë e bimëve mjekësore dhe aromatike në Shqipëri. Duke krijuar një rrjet të standardeve dhe duke ndarë njohuri dhe praktika të mira, sektori i BMA është në rrugën e duhur drejt rritjes së cilësisë dhe konkurrueshmërisë në tregun ndërkombëtar. Ky forum u bë një shembull frymëzues për bashkëpunimin dhe inovacionin në fushën e bimëve mjekësore dhe aromatike në vendin tonë.
