Policia po heton rrethanat në të cilat humbi jetën i riu, pasi ka informacione se para se të rrëzohej ka pasur një debat të ashpër mes tij dhe dy 24-vjeçarëve grekë.
Një 20-vjeçar shqiptar humbi jetën në Kalives të Greqisë, pas sherrit mes disa të rinjve, në zonën e plazhit.
Orgito Lloci, 20 vjeç është konfliktuar fillimisht me dy shtetas grekë, një rumun, një gjeorgjian dhe një bullgar në rrethana të paqarta.
Pas përfundimit të konfliktit e ndërsa të dyja palët ndodheshin në vendngjarje, Lloci nuk është ndier mirë. Menjëherë është thirrur ndihma e parë, duke e transportuar 20-vjeçarin shqiptar drejt spitalit të Hanias, ku ndërroi jetë.
Policia greke ka shoqëruar 5 personat e konfliktuar me 20-vjeçarin shqiptar ndërkohë që ka urdhëruar kryerjen e ekspertizës mjeko-ligjore për përcaktimin e shkaqeve të vdekjes.
Dyshohet se i riu shqiptar është goditur me grusht në kokë, ndërkohë që pritet të merren në pyetje dhe persona të tjerë që mund të kenë qenë dëshmitar të ngjarjes së rëndë.
