Kreu i PD në Pogradec, Genti Çela, ka kritikuar ashpër aksionin e forcave RENEA në qytet, duke e cilësuar si një dështim dhe dekonspirim të plotë. Çela tha se, pavarësisht pompozitetit me të cilin nisi operacioni për kapjen e një të kërkuari prej vitesh, objektivi nuk u gjend askund, ndërsa banorët u traumatizuan.
Sipas tij, RENEA ushtroi kontrolle të panevojshme në shtëpitë e qytetarëve të pafajshëm, duke ndaluar disa prej tyre, të cilët u liruan brenda pak orësh. Çela akuzoi se operacioni shërbeu vetëm për propagandë mediatike, duke portretizuar Pogradecin si një qytet kriminal.
“Ndërsa aksioni bombastik dështoi, eksponentët e lidhur me Partinë Socialiste në qytet po bënin gjumin e qetë,” shtoi Çela, duke nënvizuar se ndaluarit dhe të kërkuarit janë shpesh të përdorur në fushatat elektorale nga PS.
Reagimi i plotë;
RENEA NË POGRADEC, DEKONSPIRIM DHE DËSHTIM!
Një aksion tërë pompozitet zgjoi qytetin në orët e para të mëngjesit.
Me motivin e kapjes së një të kërkuari prej vitesh, u traumatizian fëmijë, gra dhe të moshuar, ku vetëm objektivi të cilin e kishin informuar vetë, nuk u pa gjëkundi.
Si për të justifikuar aksionin e tyre bombastik, shpartalluan dyer shtëpish adoleshentësh e familjarësh pa asnjë lidhje me rastin, të cilët i ndaluan dhe i liruan brenda pak orësh.
Në televizionet e propagandës së kasetave të gatshme, u trumbetua një Pogradec që i ngjante Palermos së dikurshme.
“Ku ishe-asgjëkundi e ç’bëre-hiçgjësendi”.
Ndërkohë Bajrat, Çelajt dhe ata që vendosin Çyrbet nëpër lista deputetësh, ishin duke bërë gjumin e qetë.
Post Scriptum – Të ndaluarit dhe kërkuaritnë fjalë, janë eksponentë të Partisë Socialiste në qytet dhe që përdoren në çdo fushatë, por aksioni i Reneas, për më tepër jehona mediaktike, ishte një dekonspirim dhe një antireklamë për ta dhe Pogradecin.
