Gabriela Ahmeti dhe Irini Bicka janë dy maturantet më ekselente të gjimnazit “Themistokli Gërmenji”, duke mbyllur provimet e maturës me notat maksimale. Dy të rejat tregojnë se ishte e vështirë për të arritur gjithçka dhe tregojnë emocionet e marra.
“Rezultatet ishin shumë të pëlqyeshme, mora rezultate të larta në të katërta provimet. Për pjesën e letërsisë 10.0 jam krenare sepse kisha punuar fort për tre vite, por edhe sepse është pasioni im. Ishte kënaqësi e veçantë. Ndihem mirë, e lumtur e krenare që mundi im u shpërblye në fund dhe arrita të shpërblej prindërit e mi për sakrificën e tyre”, thotë Gabriela Ahmeti, maturante.
“10 dola. 9. 5 letërsi, 9.7 anglisht,. 9.6 matematike dhe 10.0 në ekonomi Shumë e lumtur sepse puna e këtyre tre viteve, u shpërblye”, shprehet Irini Bicka, maturante.
E ardhmja e vajzave ekselente duket se është jashtë Shqipërisë, pasi sipas tyre mundësitë janë më të mëdha.
“Unë kam dëshirë që studimet e larta t’i ndjek në Itali për logopedi. Shumica presin të vazhdoj mjekësi, por nuk e kam dëshirë. Logopedia ka shkencë dhe shoqëri. Duke qene se kam qenë në seksion dygjuhësh, di italisht, bëra sakrificë mendoj duhet të shkoj Itali. Shpresoj të kthehem sërish në Shqipëri, por jetës nuk i dihet asnjëherë”, shprehet Gabriela.
“Për momentin në Shqipëri, inxhinieri ekonomike, më pas jashtë shtetit. Kam të afërm jashtë, mendoj është mundësi e mirë për të vazhduar jashtë shtetit”, thotë Irini.
Ato kanë edhe një mesazh për bashkëmoshatarët.
“Jo të gjithë i duan mësimet, të ndjekin atë që kanë dëshirë të bëjnë. Të gjithë të bëjnë atë që ndihem në mirë”, apelon Irini Bicka.
“Unë e them gjithmonë, me gjithë këto mundësi që kemi, është e mundur për gjithçka. Në aktrim, kudo, të gjithë kanë mundësi t’ia dalin”, thotë Gabriela Ahmeti.
Gabriela dhe Irini do të vazhdojnë të përpiqen për të ardhmen e tyre, kudo qoftë ajo, me shpresën se një ditë do të kontribuojnë për vendlindjen.
