Skënderbeu ka mbyllur përgatitjet për ndeshjen e radhës në kampionat përballë Elbasanit.gjokaNjë ndeshje delikate dhe shumë e vështirë për korçarët që kanë synimin për të vijuar me rezultatet pozitive dhe mbi të gjitha të përmirësojnë pozitat e tyre në kampionat ku ndodhen ende në fundin e renditjes.
Me dy fitore radhazi në kampionat duket se situata brenda klubit të paktën në anën psikologjike është përmirësuar ndjeshëm. Pikërisht këtë anë psikologjike kërkon të shfrytëzojë edhe trajneri Ernest Gjoka për të vijuar me rezultatet pozitive.
Në një prononcim të dhënë kryepankina korçare beson shumë tek ekipi i tij, por nga ana tjetër respekton kundërshtarin duke vlerësuar cilësinë që ka në skuadër. Për këtë, ka kërkuar përqëndrim maksimal nga ekipi i tij me qëllim marrjen e një rezultati pozitiv në fund të këtij takimi.
“Sigurisht që është një ndeshje shumë e rëndësishme dhe mbi të gjitha shumë e vështirë. Luajmë ndaj një ekipi që ka shumë cilësi dhe kjo tregon rendësinë e këtij takimi. Ne jemi në kushtet kur duhet të shohim hap pas hapi çdo ndeshje dhe të mundohemi të marrim maksimumin. Këtë e them me bindje pasi përtej dy fitoreve në kampionat ende nuk kemi dalë nga ajo vorbull e zonës së ftohtë.
Sigurisht që me këto dy fitore ana jonë psikologjike është përmirësuar dhe fitoret e marra na kanë dhënë më shumë besim për vijimësinë e kampionatit. Por deri në fund të sezonit mbeten edhe 9 ndeshje. Ndeshje që janë të gjitha të rëndësishme për të arritur objektivin që duam. Prandaj duhet të bëjmë maksimumin duke filluar nga ndeshja e radhës.
Në futboll nuk ka një rezultat të vetëm për të cilën t’i mund të luash, por duhet të kërkojmë të marrim më të mirën dhe mbi të gjtha të japim maksimumin tonë,” theksoi trajneri i Skënderbeut, Ernest Gjoka.
