Java e Europës ndaloi mbrëmjen e 26 majit në qytetin e Korçës, me shfaqjen teatrale “Lingua Madre – Gjuha Mëmë”, një bashkëpunim artistik ndërmjet aktores shqiptare Ema Andrea, aktores italiane Aida Talliente dhe performerses Elvira Buonocore. Kjo performancë solli në skenën e Teatrit “Andon Zako Çajupi” një përvojë unike artistike që ndërthur artin, gjuhën dhe identitetin femëror në një rrëfim të ndjerë dhe reflektues.
Shfaqja u ndërtua mbi dëshmi të vërteta të grave shqiptare dhe jo vetëm, duke trajtuar sfidat e të qenit grua në një botë ku shpesh zëri i tyre është heshtur. Me një qasje intime dhe shumëgjuhëshe, “Gjuha Mëmë” eksploroi kujtesën, identitetin dhe peshën e trashëgimisë kulturore që gratë bartin ndër breza.
Nëpërmjet artit të tyre, aktoret sollën në skenë një udhëtim emocional ku përplasen tradita dhe dëshira për liri, heshtja dhe fuqia e fjalës së pathënë. Spektatorët ndoqën me vëmendje këtë shfaqje reflektuese dhe plot mesazhe, ku në fund, bashkimi simbolik i aktoreve përcolli një mesazh të fuqishëm solidariteti: Europa na bashkon përtej kufijve dhe zërave të përjashtuar.
“Lingua Madre – A Space to Fill” vjen si një thirrje për të krijuar më shumë hapësira për zërat e grave dhe për të ndërtuar një realitet më të barabartë për të gjithë.
