Skuadra U-19 e Skënderbeut ka arritur një rezultat historik, duke barazuar me moshatarët e Aston Villës në ndeshjen e parë të vlefshme për raundin e UEFA Youth League.
Të drejtuar nga trajnerët Osmanllari dhe Çajku, korçarët zhvilluan një paraqitje të shkëlqyer, duke treguar nivel të lartë loje, organizim dhe shpirt gare përballë një kundërshtari me traditë në futbollin europian.
Megjithatë, për ndeshjen e kthimit në Angli, Skënderbeu do të përballet me dy mungesa të rëndësishme.
Qendërmbrojtësi Emeodi dhe mesfushori organizator Oppong nuk do të jenë pjesë e ekipit, pasi nuk kanë arritur të pajisen me vizë britanike.
Sipas burimeve pranë klubit, procesi i aplikimit është penguar nga afatet e shkurtra kohore mes dy ndeshjeve më pak se dy javë çka nuk ka lejuar përfundimin e procedurave të nevojshme nga autoritetet përkatëse.
Këto mungesa konsiderohen një goditje për formacionin e trajnerëve, të cilët tashmë duhet të gjejnë zgjidhje alternative për sfidën e vështirë që i pret në Angli.
