Pogradec/Shfaqet sot në mbrëmje në “Sheshin e Trëndafilave” shfaqja “Gruaja e thyer” e aktivistes Simone de Beauvoir, me regjinë e Endri Çelës dhe interpretim të Adriana Tolkës. Një shfaqje ku publiku vihet në provë me mizansenat dhe veprimet ekstreme, që i qëndrojnë besnike autores.
Vetmia, boshllëku, jeta lëmsh… drama e Murielit, si “Gruaja e thyer” impaktin e parë e transmeton vizualisht.
“Simone de Beauvoir është një zë i fuqishëm, që i flet qenies njerëzore, gruas, e zhbirilon atë. Unë dhe Adriana kemi dashur të paraqesim pikërisht këtë nisur nga një shpirt njerëzor, një individ, që ndodhet në një krizë identiteti”, është shprehur më herët regjisori Endri Çela.
Regjisori me ndihmën e skenografisë së Beqo Nanajt e kostumografisë së Sofi Karajt mbërthen përmes mizansenave rebelimin, dhimbjen, kompleksitetin e një gruaje, me një kalvar vuajtjesh, duke prekur në skutat e tragjedisë simbolikisht edhe vdekjen.
Dy martesa të dështuara, një vajzë e vetëvrarë, i biri që jeton me ish bashkëshortin… e Muriel që teksa zhytet në të shkuarën, shkëputet edhe më shumë nga e tashmja, dhe në vend të zgjidhjeve gjen fajtorë për gjithçka që ka ngjarë.
Shpërthimet emocionale të personazhit janë të forta, drama ekzistenciale e Murielit, gruas së shkëputur nga shoqëria, vjen pa e zhveshur nga mizansenat ekstreme e veprimet intime.
