Qarku i Korçës, dhe në veçanti fusha e Maliqit, mbetet një nga zonat më të rëndësishme në vend për kultivimin e grurit, me mbi 12,000 hektarë të mbjella çdo vit. Fermerët në bashkinë e Maliqit janë ndër kontribuesit kryesorë të kësaj kulture, ndërsa për të rritur rendimentin dhe cilësinë e prodhimit, Drejtoria e Bujqësisë në këtë zonë bashkëpunon ngushtësisht me Qendrën e Transferimit të Teknologjive Bujqësore (QTTB) Lushnjë.
Sipas Arben Dulellarit, drejtor i Bujqësisë dhe Mbrojtjes së Konsumatorit në Bashkinë Maliq, ky bashkëpunim synon përzgjedhjen e kultivarëve të grurit më të përshtatshëm për klimën dhe tokën e zonës, duke garantuar kështu prodhim të bollshëm dhe cilësi të lartë.
Ndryshimet klimatike, me verëra gjithnjë e më të nxehta, e bëjnë të nevojshme kultivimin e varieteteve me pjekje të hershme, në mënyrë që të shmanget ndikimi negativ i temperaturave të larta në cilësinë e grurit. Kjo ndihmon që prodhimi të mbetet brenda standardeve të kërkuara nga tregu.
Ndër fshatrat me sipërfaqet më të mëdha të mbjella me grurë përmenden: Pojani, Pirgu, Zvirina, Sheqerasi, etj., të cilët luajnë një rol të rëndësishëm në furnizimin e tregut lokal dhe kombëtar me këtë kulturë strategjike.
