Guri i Kamjes është një nga monumentet më të veçanta natyrore të Bashkisë së Pogradecit. Eshtë gur i cili ngrihet midis Gorës dhe Mokrës së Sipërme, duke marrë pamjen e një vapori që lundron mbi një “Det të blertë” per vetë faktin se e gjithe zona përreth është e mbuluar nga gjelbërimi dhe pemët e ndryshme.
Guri i Kamjes ka përmasa 100m i gjatë, i gjerë 80m, i lartë 70m dhe ndodhet 1461m mbi nivelin e detit. Forma e tij vjen nga skalitja dhe modelimi i vazhdueshëm nga erozioni dhe era.
Për të shkuar në Gurin e Kamjes është pak e vështirë për shkak të mungesës së infrastrukturës të mirëfilltë rrugore.
Prandaj është detyrë e Ministrisë së Turizmit dhe Bashkisë Pogradec të hartojnë një projekt të mirëfilltë për ta bërë këtë monument edhe më të vizitueshëm për vendasit dhe të huajt. Një projekt i cili do të niste më infratrukturën rrugore, shtimin e tabelave informuese dhe orientuese rreth historikut të tij dhe mënyrës se si ai është krijuar për të mbërritur tek pamja qe ka sot. Si dhe funksioni që ka pasur në etapa të ndryshme.Një projekt i tillë do të shtonte edhe më vizitorët atje për ta kthyer në një vend për guida të ndryshme disa ditore në këtë zonë dhe jovetëm një ditore.
Çdo vit Guri i Kamjes pret qindra banorë të zonës të cilët festojnë ngritjen e flamurit më 28 Korrik të vitit 1912, katër muaj përpara shpalljes së pavarësisë së Shqipërisë.
